Les nuestres cafeteres Les nuestres cafeteres

Les nuestres cafeteres

Les nuestres cafeteres

Encántanos el café y, por eso precisamente, alucínennos les cafeteres. Son preseos pa faer maxa que’n so diseñu siempres hai enforma inxeniu. Hailo en xenialidaes como la Moka Express de Bialetti, imitada y copiada hasta l’infinitu; na cencellez de la cafetera d’émbolu, llamada tamién ‘prensa francesa’, anque l’inventu reclámenlu tamién n’Italia; na versatilidá de la AeroPress, o na induldable obra cume del vapor adomáu pa facer café: la cafetera espresso.

Poro, proponémonos poner a la vuesa disposición la más amplia ufierta posible d’aquelles cafeteres que nos gusten: pol so diseñu, pol so calter icónico y, sobremanera, por cómo faen café, yá sía un delicáu café de filtru o un intensu espresso.

Pel momentu, cuntamos con unes 300 referencies de cafeteres, cacía y caciplos pa ellaborar y esfrutar de cafés y floritos de la esbilla de firmes de reconocía traxectoria qu’enunciamos darréu.

Bialetti

Ye la marca sinónimu de cafetera italiana. La centenaria empresa fundada por Alfonso Bialetti nel Piemonte, anguaño radicada en Lumbardía, sigue produciendo n’Italia la icónica ‘Moka Express’, ún de los más aclamaos diseños industriales de la historia. Sicasí, el so catálogu enantóse con diseños nuevos y too tipu d’accesorios.

Ver productos

Lacor

La firma vasca Lacor lleva cerca de setenta años como una de les referencies en cacía pa hostelería y pa casa, con un mui ampliu catálogu qu’inclúi electrodomésticu pequeñu y ferramienta pa too tipo d’ellaboraciones. Rescampla ente esi catálogu la calidá de les sos cafeteres d’aceru inoxidable.

Ver productos

Guzzini

Otra centenaria firma italiana, ésta allugada na rexón de Les Marques, qu’axunta nel so catálogu un apueste pola innovación y el diseñu más curiáu. Fratelli Guzzini destacóse nel usu de materiales sintéticos de vanguardia y la so integración con porcelana o vidrio, premises que cumplen tamién los sos aparatos llétricos.

Ver productos

Hario

La empresa xaponesa Hario entamó la so actividá en 1921 como fabricante de productos de vidrio resistente a temperatures altes pa llaboratorios. A partir de la década de 1960 diversificó’l so catálogu con una celebrada gama de productos pa ellaborar café y té, ente los que rescampla’l sistema V60 d’infusión por gotéu.

Ver productos

AeroPress

La cafetera AeroPress inventada por Alan Adler en 2005 ye de les más celebraes innovaciones nel mundu del café nel presente sieglu. Cenciellu y inxeniosu, la versatilidá del instrumentu que fabrica la casa de ‘frisbees’ Aerobie nun dexa de conquistar a aficionaos de tol mundu.

Ver productos

Moccamaster

La empresa familiar holandesa Technivorm sigui fabricando otru diseñu icónicu: la Moccamaster. Considerada como la meyor cafetera de goteo de la hestoria pola cencellez d’usu y la so calidá d’estracción, trátase ensin duldes d’un pequeñu ‘milagru’ téunicu y empresarial européu del qu’entá podemos esfrutar. El so diseñu y la calidá de construcción permitiéron-y convertirse na primer cafetera automática cola certificación de la Specialty Coffee Association.

Ver productos

Finum

Fundada en Hamburgo en 1845, la matriz de lo que güei ye Finum dedicóse inicialmente a la importación de café y esportacion de maquinaria. Anguaño ye referente mundial nel diseñu y desendolcu d’infusores, molinos y cacía especializada pal consumo de café y floritos.

Ver productos

Baratza

Baratza ye una de les firmes más innovadores y personales nel mundu del café d’especialidá. Nacía col envís de cubrir la demanda d’un molín de gran calidá pal mercáu domésticu a un preciu conteníu, tien desendolcao dende la so fundación en 1999 dellos de los productos más célebres del sector.

Ver productos

Ibili

Posiblemente, la empresa vasca Ibili, fundada en 1942, cuente con ún de los más estensos catálogos de caciplos y cacía domésticos. La so oferta fízose asina con un espaciu reconocíu pola escelente relación calidá/preciu de los sos productos, dende cafeteres a infusores, pasando per termómetros, termos o molinos.

Ver productos

Könitz

Könitz Porzellan ye una hestórica fábrica de taces y cacía en porcelana y cerámica del estáu alemán de Turinxa que tres de ser privatizada y adquirida por un heriede del fundador de la firma ceramista bávara Rosenthal, espolletó con diseños curiosos y alta calidá de fabricación.

Jata

Jacinto Alcorta (Jata) fundara en 1943 esta firma d’electrodomésticos en Abadiano, Vizcaya. Dente entós, la empresa amplió la so actividá y cuenta con dellos productos para la elaboración de café y floritos, como cafeteres espresso, de goteo o de tipo italiano, asina como molinos llétricos.

Ver productos

Bernar

La empresa fundada por Bernardo Suárez Fombona en Xixón en 1946 algamó a finales de la década de 1970 sonadía pola fabricación y comercialización de máquines domestiques pa la ellaboración de churros y balances. Anguaño cuenta con un catálogu ampliu nel qu’inclúi cafeteres d’aluminiu y aceru inoxidable.

Ver productos

© 2019 - 2024