Los nuestros cafés Los nuestros cafés

Los nuestros cafés

Los nuestros cafés

Gústanos que los cafés sepan bien. Puede paecer una obviedá, pero nun lu ye tantu si tenemos en cuenta lo poco que paráramos a pensar en qué ye lo que bebíemos cuando dexábemos qu’un fervinchu casi negru que sabía a carbón o cauchu quemáu fuera l’oxetivu de les nueses ellaboraciones. Y non: el café sabe a munches más coses y nun precisa escondese ente montes d’azucre y océanos de lleche pa ser potable.

Eso sí, hai cafés y cafés. El nuesu oxetivu ye ufiertar siempres una esbilla variada y accesible de cafés de la más alta calidá. Procuramos tener siempres, con un puntu de turre y de frescura óptimos, una bona representación de les grandes árees del ‘cintu del café’ qu’arrodia’l planeta ente dambos trópicos: Suramérica, Centroamérica, Etiopía y restu d’África, Asia.

Cafés San Agustín

Pa ello cuntemos dende un principiu cola sapiencia cafetera del equipu de San Agustín cafés d’especialidá, qu’encabeza’l maestru tostador Luis Ángel Garrido.

La so hestoria ye’l frutu del interés d’un home inquietu. De bagaxe hosteleru, llegó al turre énte les dificultaes p’atopar los cafés que quería pa sí y pa la so vecería del café Jazz Plaza, nel centru de Llión. Tres dellos viaxes y formaciones, fai más d’una década empezó los sos primeros turres con un criteriu yá definíu. Convertíase asina, n’unu de los pioneros del café d’especialidá n’España.

Dende entós, non solo foi perfeccionando los sos métodos de trabayu sinón que s’afitó como ún de los tostadores más regulares y con mayor garantía calidable n’España y, cada vez más n’Europa. “Hai microtostadores con cafetazos, con turres bien bonos, pero daquién que como San Agustín tenga un nivel bien alto en toos y cada unu de los cafés qu’ufierta, hai bien pocos en tol continente”, comentábanos unu de los más reputaos baristas asturianos mientres una conversación sobro los argumentos polos qu’en Ca Silverio confiamos nel criteriu de café San Agustín.

Anguaño, los cafés que vos ufiertamos pasaron polos filtros que l’equipu de Luis Ángel Garrido se autoimpón: siempres cafés de finques y oríxenes bien concretos, d’última collecha. Les amueses, turraes pa la cata, son testaes por él y les sos collaboradores na selección del café verde: Katarzyna Wiktoria Koziana, certificáu Brewers SCA, y María Garrido, titulada Q Grader Arabica SCA.

Los trés realicen cates a palpu de les amueses y, si tán d’alcuerdu, el café pasa la peñerada y entra a formar parte de la so ufierta de turres. Depués, ye la esperiencia y el bon gustu de Luis Ángel Garrido’l qu’afina’l turre definitivu d’esos cafés, procedentes de finques qu’empleguen unos estándares de cultivu y beneficiu de la más alta calidá, y preseleccionaos por un pequeñu importador que sigue esos mesmos criterios.

Esa metodoloxía, y toa esa cadena de trabayu, ye la que favoreció qu’en Ca Silverio teamos dafechu seguros de que tolos cafés qu’ufiertamos componen una bona amuesa de lo que’l mundu del café d’especialidá puede ufiertar. Solo queda probalos, xugar con distintos métodos d’estracción y esfrutar de tola dedicación que hai tres de cada café.

Ver los cafés disponibles

© 2019 - 2024