“La cafeína nun ye adictiva”

“La cafeína nun ye adictiva”

El farmaceuticu Nikolaos Kalamidas enfrenta los mitos al rodiu de la cafeina y el so consumu

“La Organización Mundial de la Salú (OMS) nun considera la cafeína como una sustancia adictivo”, afirma’l farmacéuticu y “apasionáu del café” d’orixe griegu y afincáu n’Asturies, Nikolaos Kalamidas. “Si un consumidor habitual de café de sópitu dexa de consumilo”, esplica, “va sufrir diversos efectos similares a un síndrome d’astinencia, como dolor de cabeza, mientres unu o dos díes, pero son efectos psicolóxicos, el to cuerpu realmente nun reclama la cafeína, nun te pide cafeína pasáu esi tiempu”.

Kalamidas ufiertó’l pasáu 15 de febreru de 2020 na planta cimera de The Coffeest, en Piedrasblancas (Asturies), una charra sobro ‘Los secretos de la cafeína’ na que se trató d’encetar diversos mitos y prexuicios en redol a esti alcaloide presente en múltiples plantes que lo desenvolvieron “como empuste pa insectos”, pero qu’una vegada inxeríu polos humanos tien unos efectos bien reconocibles y, na so xusta midida, bien positivos.

Ente esos efectos, el farmacéuticu numberó la so capacidá p’alzar temporalmente la frecuencia cardiaca y la presión arterial, incentivar el consumu de grases acumulaes nel cuerpu o aumentar l’estáu d’alerta” del consumidor. Too ello dexa en términos xenerales “un meyor rendimientu físicu y mental” que va sumiendo cola metabolización de la cafeína nel cuerpu, la so descomposición en “otres molécules como la teobromina, presente nel cacáu, la paraxantina o la teofilina, que caltienen efectos similares a los de la cafeína hasta que son esaniciaes definitivamente al traviés de la orina”, comentó. Tou esi procesu, apuntó Kalamidas, suel lleva-y al cuerpu “ente 3 y 4 hores” tres les que yá nun se carecen’ los efectos de la cafeína.

“Los efectos remiten cola metabolización de a cafeína, en trés o cuatro hores”

Nikolaos Kalamidas

Nesi tiempu, básicamente, lo que tuvo faciendo la cafeína inxerida al consumir café (o té, cacáu, guaraná o mate), ye “bloquiar los receptores de adenosina”, molécula que nel cuerpu aumenta los niveles de suañu ya induz “al descansu”. Esi bloquéu ye lo que provoca “l’estáu de vixilia que se venceya a la cafeína, indicó’l farmacéuticu.

Esos efectos, ello ye que son los que favorecieron que la cafeína fuera considerada poles autoridaes deportives y sanitaries una ‘sustancia dopante’ ente 1970 y 2004. Sicasí, dende esi últimu añu desestimóse qu’esos efectos temporales de la cafeína sían abondo potentes como pa ser consideraos dopantes, señaló.

Lo cierto ye qu’esos efectos de la cafeína nel cuerpu humanu, apuntó Kalamidas, sumen ensin mayores consecuencies, siempres que la inxesta sía razonable, cuidao que a partir de ciertes dosis dexen de ser efectos ‘positivos’. “La OMS considera que les dosis diaries segures pa una persona adulta de 70 quilos de pesu ye de 400 miligramos al día, unos 4 cafés”, apuntó’l farmacéuticu. Esa cantidá amenorga a la metá nel casu de lactantes y embarazaes “porque la cafeína tárdase más en metabolizar y pasaría al fetu”, mientres que pa los neños la dosis máxima encamentada sería de 2,5 miligramos de cafeína per quilu de pesu: una taza al día. “Nel casu de los neños nun habría mayor problema, sacantes que yá de por sí son hiperactivos, y siempres va ser más recomendable un bon café qu’una llata de refrescu de cola”, comentó l’espertu.

Si se devasaren eses dosis encamentaes yá podríen dase efectos temporales indeseaos asociaos al ritmu cardiacu o la tensión arterial, inclusive llegar a un nivel tóxicu potencialmente mortal que “la OMS asitia ente 150 y 200 miligramos per quilu” corporal, lo que se llograría “al tomar de golpe l’equivalente a ente 100 ó 200 taces de café”.

Con too, añedió Kalamidas, “estudios recientes sobro la sensibilidá a la cafeína detectaron que determinaos xenes del nuesu ADN fáennos más o menos sensibles a la cafeína”, lo que va esplicar que “haya xente que diga que toma cinco taces de café y que nun nota nada”, mientres otres persones amuésense “más sensibles” a los sos efectos anque, n’ocasiones, esos efectos puedan confundise con ‘sensaciones’ más de tipu psicolóxicu que reales.

Asina, por casu, el farmacéuticu citó’l mitu de que la cafeína “provoca velea”. “Lo cierto ye qu’eso nun ye asina con un consumu normal de café. Lo único que nos pasa ye que tenemos más sensación d’alerta y menos de cansanciu”, pero’l suañu nun sume. “Un exemplu ye cuando los estudiantes pasen la nueche previa del exame en vela bebiendo café: tán despiertos, pero’l café nun llogra quitar el cansanciu”.

“Lo meyor ye disfrutar d’un café preparao a modo y de la mayor calidá posible”

Nikolaos Kalamidas

Seya como quier, lo evidente de los efectos de la cafeína nel cuerpu fai que s’estendieren los mitos en redol a dicha sustancia. “Nun te fai más intelixente”, pero tampoco va ser cura nin causa d’enfermedaes. “Apocayá hubo un bulo en redol a la efectividá del café verde como quemagrases”, recordó Kalamidas n’alusión a estudios entá insuficientes sobro los efectos antiosidantes de diverses sustancies conteníes nel café. Como tamién son insuficientes, añede, los estudios que reparen beneficios na prevención de determinaos tumores.

En cuenta de pensar nos sos posibles efectos curatibles, concluyó’l farmacéuticu, ye meyor centrase n’esfrutar del so valor gastronómicu y los sos prestosos efectos, tomando “cuanto café queramos, dientro d’una llende razonable, siempres que sía bien preparao, con un turre non bien alto y de la meyor calidá que sía posible”.