¡Abrimos tienda online!
¡Abrimos tienda online!
Pa los que nun quieran lleer demasiáu, dicímoslo en poques palabres: abrimos tienda online na que vais poder mercar casi tolos nuesos productos. Los espectaculares cafés que nos turra San Agustín, los nuesos productos Bialetti, Lacor, Hario, Guzzini, Finum, Ibili, Moccamaster o Aeropress, ente otros, cafeteres, recambios, accesorios, tes, fervinchos… Almítense pagos con tarxeta, por tresferencia bancaria, o en metálicu si optáis por pasar a recoyer la compra pola tienda física. Pal restu, cuntámosvos un pocu más sobro esti proyectu.
Dalgunos yá vais saber que llevamos como un par d’años anunciando la nuesa intención d’abrir una versión online de Ca Silverio cafés y cafeteres. Pero tuvo que venir una pandemia pa que esa idea sía una realidá.
Nos postreros dos meses dedicáronse munches hores de trabayu y quebraderos de cabeza pa llegar a esta nota de presentación. La verdá ye que solo’l tener un hermanu con superpoderes (ye capaz de falar coles máquines, entendeles y que lu entiendan), permíteme cuntar güei qu’abrimos una tienda qu’arrinca con alredol de 150 referencies a les que se van dir sumando más nos próximos díes. La nuesa intención ye qu’esti nuevu espaciu tenga un funcionamientu autónomu, non subsidiario de la tienda física, de cuenta que equí podáis atopar ufiertes esclusives, cupones descuento y productos específicos pa Ca Silverio online.
El funcionamientu de la tienda, per otru llau, nun ye nada orixinal: furrula esactamente igual qu’otros miles de tiendes online que pueblen internet, anque non toos tengan coses tan chules, nin tan práctiques pal aficionáu al café o los fervinchos, nin a tan bon preciu… Hai un carrín de la compra, que se va enllenando colos productos qu’escoyáis, y un procesu de pagu nel que s’apliquen los descuentos que fueren aplicables, si los hubiere, y los gastos d’unvíu.
Dica agora unviamos los nuesos productos a la España peninsular, por 5 euros, y a Baleares, por 7,50 euros, nun serviciu de paquetería urxente (entrega en 24 hores en díes llaborables). Esperamos nes próximes selmanes axustar eses tarifes tolo posible y ampliar les opciones d’unvíu, tamién cola posibilidá de llevar los nuesos productos a otros territorios. Nos siguientes enllaces puede aportase a les riegles que rixen la nuesa actividá o a la nuesa política de devoluciones, pa quien quiera saber más.
Y yá solo quédanos davos les gracies por tar xunto a nós hasta agora, y deseyar que sigamos atopándonos munchos años más, yá sía nel númberu 25 de la cai Dolce d’Ochobre de Mieres, yá sía en casilverio.com. ¡Munches gracies a toos!
Fai un comentariu