Masterchef nun ye mui de café :(

Masterchef nun ye mui de café :(

Ayeri llamóme la mio madre al móvil un tanto alteriada. Recreo la conversación:
-¿Visti anueche Masterchef?
-Non, ¿por?
-Fixeron la prueba d’eliminación con café y sacaron a una esperta: preguntáron-y por variedaes de café y nun atinó a dicir más que ‘Colombia’, y que si lo entemecíen con to-rre-fac-to…

Entendía la indignación de la mio señora madre, pero seguru que taba influyida pol so desatamañáu amor por tolo que tien que ver col so fíu.

Pero, esta mañana, quien volvió aludir con indignación al últimu programa de Masterchef foi la mio respetadísima colega Androidcombate. ¿Cómo se supon qu’un programa d’una televisión pública con pretensiones de divulgación gastronómica podría despreciar de tala manera la segunda bébora más consumida del mundu dempués de l’agua a palu secu?, preguntábase.

Y claro, tanta fola d’indignación acabó por espertar el mio interés y decidí rescatar el murniu episodiu. Equí déxovos el vídeu: podéis saltávoslo tou hasta les dos hores y un minutu de programa, si queréis.

La verdá ye que yo nun daba creitu: Samantha Vallejo-Nágera cantaba con desparpajo una retafila de derivaos y subproductos de café, inclusive’l to-rre-fac-to, ensin qu’aparentara vergüenza por ello. Apaez tamién n’escena una esperta, al paecer emplegada de la cadena de grandes almacenes que patrocina’l programa, que fala del perfil de sabor del café de Colombia, asina en xenéricu, como «bien acedu» y con «gustu a café» ¿?. Y tou esto nun programa pol que pasaron profesionales que punxeron la cocina española nel mayor nivel de reconocencia internacional de la hestoria, y que popularizó les ‘sousvides’, los kits de esferificación y la cocina con nitróxenu líquidu.

¿Por qué, entós, fáen-y esto al café? ¿Por qué falen del café amargoso como una virtú? ¿Por qué traten el torrefacto como daqué dignu y non como la resultancia del inxeniu de dalgún aviespáu tostador qu’en tiempos de penuria vio nesa técnica una manera de colar café podre y fediento al probe consumidor ibéricu?

Ciertu que nun tenemos d’escaecer que, a lo último, Masterchef ye un reality, non un cursu del Basque Culinary Center, pero seguru que nun s’atreven a entamar una prueba sobro cocinar carne ensin estremar un chuletón de güe d’una raxa de choped, nin llevaríen a un supuestu ‘espertu’ patrocináu que se dedicara namás a parolar sobre les variedaes de mortadela ‘con y ensin’ aceituna.

La pista definitiva de lo que taba asocediendo dióla a la fin el ganador de la prueba, Andy, que bautizó’l so platu con un xuegu de palabres celebráu polos xueces: ‘Nespresa ibérica’. Esa ‘nespresa’ yera la clave, pos evidenciaba una vegada más del gran desconocimientu qu’hai n’España de lo que ye en realidá’l café, inclusive a qué sabe. Un desconocimientu que ye alimentáu pola mesma industria pa vender depués ‘café del trópicu’ como si eso supunxera dalgún tipu de valor añedíu. Ye esa industria la qu’ocupa los buecos del desconomientu y presenta como cualidaes óptimes, o siquier deseables, los defectos del so productu: café negro, amargosu, carbonizáu…

Y sí, esi desconocimientu perpetúalo por desgracia xente de sonadía nel mundu de la gastronomía y la cocina, que nun siente vergüenza dalguna al espublizar que sirven café encapsulado nos sos restoranes -¿van sirvir tamién campofríos ‘vuelta y vuelta’ premium?, ¿o los fadrán en tempura?-… ¿Presumiríen col mesmu enchipe de sirvir tranchetes?

L’oxetivu en tolos casos ye vender. Yá, tamién, n’última instancia, el del blogue del responsable d’una tienda de cafés d’especialidá, claro, (anque non solo, que conste ¿eh?). Pero nel casu de quien aparenten buscar ciertu calter divulgativu, máxime cuando tienen una televisión pública como altavoz, sería deseable un mayor esfuerciu qu’el de repitir cuatro tópicos encontaos en criterios puramente económicos.

¡Un respetu poles madres de quien dedicamos al café que de verdá sabe a lo que tien que saber el café, por favor!