¿De qué va eso del Día Internacional del Café?

¿De qué va eso del Día Internacional del Café?

Les redes sociales enllénense güei de felicitaciones pel Día Internacional del Café, una celebración qu’empieza a asitiase desque fuera instaurada fai apenes cinco años pola Organización Internacional del Café (ICO, nes sos sigles n’inglés). Pero… ¿de qué va esta xornada?

Según los sos promotores, pretendi ser “una celebración de la diversidá del sector del café, de la so calidá y de la so pasión”. Amás, “ye una oportunidá pa por que los amantes del café compartan el so amor pola bébora y espresen el so sofitu a los millones de granxeros que dependen del arumosu granu”.

La primer edición de la xornada enmarcóse na Expo de Milán de 2015, onde la ICO presentó un proyectu que venía arrexuntar los Díes del Café que, con distintes sides, veníen celebrándose dende la década de 1980 en dellos países, dende Xapón (pioneros na celebración, al paecer), hasta Alemaña, Irlanda o Estaos Xuníos.

Lo cierto ye que decenes de países celebraben una xornada d’esi tipu fundamentalmente con un enfoque comercial, con promociones en cafeteríes y tiendes, y en menor midida como un día pa la divulgación de tolo qu’hai detrás d’una taza de café y les sos implicaciones socioeconómiques y culturales.

Pa reforzar esi últimu enfoque ye pa lo que la Organización Internacional del Café decidió unificar toes eses xornaes ‘nacionales’ nuna única internacional que tuviera mayor algame y un mayor calter divulgativu.
Nun ta claro’l por qué de la escoyeta del 1 d’ochobre, pero lo cierto ye que la gran mayoría de los díes ‘nacionales’ que se veníen celebrando hasta entós teníen llugar ente’l 29 de setiembre y el 3 d’ochobre, anque tamién se daben en mayu o n’agostu. Y eso, al pie de la coincidencia de feches cola citada Expo de Milán, paez ser la razón pola que s’afitó’l 1 d’ochobre como’l Día Internacional del Café.

Cada añu, la ICO dedica la xornada a un colectivu concretu. En 2020, quixo centrase nes nueves xeneraciones de profesionales del café, y pa ello presentó “un programa de sofitu a la próxima xeneración de muyeres y homes nuevos nel café, dando vida a les sos idees innovadores pa beneficiar a tola comunidá cafetera y pa sofitar la recuperación de la pandemia, construyendo un futuru más prósperu pal sector”.

(Semeya principal: Secáu de café pacamara llaváu nun patio de la finca Pacas de Guatemala. Por Christian Burri en Unsplash).