Blogue

5 años de gratitú 5 años de gratitú

5 años de gratitú

5 años de gratitú

Hai güei cinco años vivíamos los nervios del primer día de cole: por fin consiguíamos abrir les puertes de Ca Silverio Cafés y Cafeteres. Yera la culminación de casi un añu de trabayu previu nel que fuimos dando forma a una idea un tanto marciana que, adulces, creemos qu’acabó por formar parte del paisaxe del pequenu comerciu mierense.

La principal sensación güei, ensin dulda, ye de gratitú pa con toles persones que conocimos y que nos visitaron nestos cinco años. Y perdonái si paezvos que me pongo un pelín ñoñu, pero con toa sinceridá puedo escribir güei que’l mayor llogru d’esti modestu negociu foi’l poder conocer a la cantidá de persones maraviyoses que pasastis y pasáis por Ca Silverio: sentímosvos mui cerca y solo espero qu’asina lo sintáis tamién.

Por eso dame rabia nun recordar con exactitú quién fueron les primeres persones qu’entraron na tienda. Lo que sí sé, ye que dende aquel día tolos que cruciastis la puerta de Ca Silverio pasastis a ser una parte bien pervalible y quería de les nueses vides.

Nesti quintu aniversariu tamién queremos alcordanos de quien dende un principiu contribuyeron a dar forma a un proyectu pal que munchos agoraben una curtia vida. -“Esti nun dura seis meses, dígotelo yo”, afirmó naquellos primeros díes un desacertáu analista al otru llau del escaparate-. Unu d’aquellos sofitos cruciales foi’l de Rafa, del centru d’empreses Valnalón, que supo reconducir l’entusiasmu inicial pa dar forma a un proyectu de negociu mínimamente vidable. L’otru gran sofitu foi Leandro, de The Coffeest Avilés, quien contribuyó a enfocar puramente escontra’l café d’especialidá les conocencies que sobre’l mundu del café habíemos pañao dende diba tiempu. Y foi tamién la persona que nos pondría en contactu con Luis Ángel, de Café San Agustín, qu’empezaba a abrir un buecu nel entós entá exiguo panorama de microtostadores d’especialidá y col que venimos trabayando y aprendiendo dende aquel 2016.

En realidá ye muncha xente -y arrenuncio de faer una llista refecha-, la que d’una manera o otra ye parte yá de Ca Silverio. Y a toa esa xente, a toos vós, ye a la que nesti aniversariu queremos treslladar el nuesu más fondu agradecimientu. Bien de gracies a toos.

© 2019 - 2021