Blogue

El meyor café del mundu El meyor café del mundu

El meyor café del mundu

El meyor café del mundu

“El meyor café del mundu ye esi que caguen los monos, ¿non?”.

Asocede casi toles selmanes: daquién crucia la puerta, echa una güeyada rápida a la tienda y, tres un curtiu tantéu, te pregunta pol meyor café del mundu.

La entruga suel dir siguida d’alternatives: “¿Ye’l Blue Mountain esi de Xamaica?” Les más socorríes queden en Colombia y, cada vez más, apuesten per Etiopía, que ye d’onde vien el café”.

Civeta (que non monu) encaxeyada nuna granxa de café kopi luwak n’Indonesia. (Foto: Wikimedia obra de surtr con llicencia CC-BY-SA)

N’otros casos les duldes esnalen en redol al métodu d’ellaboración del café: “¿La meyor ye ‘la de la cafetera de tola vida’?” o “¿Como’l café de pota nun hai nada?”.

Casi toes eses entrugues tienen un “non” por repuesta. Y ye un “non” sinceru. El café, como casi tou productu agroalimentario, ye un productu tan complexu nel qu’inflúin tantos factores, que ye imposible responder afirmativamente a cualquier entruga que busque una respuesta tan categórica como la d’afirmar qué café ye’l meyor del mundu o qué métodu ye’l meyor para estrayer la meyor bebida.

Cafetera Moka de Bialetti. (Foto: Charlie Solorzano en Unsplash).

El chovinismo suel facilitar les coses pa afirmar que “la meyor sidra del mundu ye l’asturiana” o que “nun hai maría como la portuguesa”, pero la realidá siempres ye más dura y más complexa.

Seique, la realidá consiste en pasanos la vida buscando un trabayu perfectu, un llugar perfectu pa vivir y una taza de café perfecto pa beber. Seique acabamos per averanos a lo que consideramos perfectu pero, en cuestiones como’l café, lo qu’importa ye difrutar de la busca y probar, probar, probar y probar tol café que síamos capaces. Paga la pena.

Por eso abrimos esti espaciu. Nesti blogue queremos faevos partes d’ese proceso de preba en busca d’una perfección imposible. Vamos Probar cafés y cafeteres, vamos esperimentar métodos d’ellaboración y vamos conocer a profesionales del mundu del café colos que cavilgar sobro la que, quiciabes, sía la bébora más universal. Convidámosvos a acompañanos nesi llabor.

© 2019